Mtazamo wa Usajili Ligi Kuu Dirisha Dogo – Simba SC

Dirisha Dogo la usajili nchini Tanzania linafunguliwa Jumatano Novemba 15 na litafungwa Disemba 15, 2017.

Vilabu hutumia kipindi hicho kidogo cha usajili kuongeza wachezaji katika kuimarosha vikosi vyao kuelekea raundi ya pili ya lala salama.

Soka 360 imefanya uchambuzi ya Timu za Ligi Kuu na mahitaji yake ya wachezaji katika kipindi cha dirisha dogo.

Naanza na Simba SC

Eneo la ulinzi

Dirisha dogo la usajili hawana kazi kubwa sana katika eneo hili ni kiasi cha kutathimini majeruhi ya Shomari Kapombe na mustakabali wao kama timu hususani kwenye mechi za kimataifa kombe la Shirikisho.

Ubora wa Erasto kulia sambamba na Ally Shomari bado wanaweza kuliziba vyema pengo lake . Erasto ni moja ya usajili makini ambao Simba walifanya; kimbinu ni mchezaji kiraka kutawala eneo lote la nyuma pia kiungo cha chini.

Eneo la kiungo

Ni eneo ambalo wapo vyema sana kuliko eneo lolote lakini kuna mabadiliko yanatakiwa kufanyika. Siioni nafasi ya Jamali Mnyate ndani ya klabu hiyo. Huyu wamtoe kwa mkopo kufungua nafasi ya wengine au kubaki na wachezaji wachache ambao kocha anaweza kuwatumia vyema.

Ndemla kama atafanikiwa Sweden ni jambo la kheri ili kijana Mohamedi Ibrahim apate nafasi ya kucheza. Muunganiko wa Mkude, Kotei , Muzamiru , Ibrahim, Kichuya na Haruna ndio ‘ pride ‘ ya Simba. Lakini ni wakati wa kuwaongeza mikataba Muzamiru na Kichuya kama bado hawajafanya hivyo maana inakwenda ukingoni.

Ushambuliaji

Hili ndio eneo ambalo kamati ya usajili na kocha mkuu wa Simba wanatakiwa kuwa makini sana kipindi hiki cha usajili. Yafanyike maamuzi magumu juu ya Laudit Mavugo; avunjiwe mkataba kama walivyofanya Azam FC kwa Yahya na kutafuta mchezaji wa kigeni mwenye ubora mzuri kama mshambuliaji kiongozi.

Boko ni mzuri kwa pacha yake na Okwi lakini majeruhi na soka lake kuelekea ukingoni anakosa consistency nzuri ya kupambania timu kila mechi . Simba wakitulia na kupata mpachika mabao mwenye wastani wa 1:1 asie na aibu na goli watafika mbali na wanaweza kubeba kombe la ligi kuu msimu huu pia kufika mbali michuano ya Shirikisho .

Wajitafakari pia kwa Nicolas Gyan; huyu mshambuliaji toka Ghana sijaona mchango wake chanya Simba SC toka atue nchini kama ilivyo kwa Emanuel Okwi . Kama terms za mkataba zina kipengele cha ‘ ufanisi ‘ ni wazi Simba wamfungulie mlango wa kutokea . Wapo wazawa bora zaidi yake lakini si Luizio huyu nae hatoshi kuwepo Msimbazi .

Kama Gyan na Mavugo wataondoka na kamati ya usajili ikapata wachezaji wazuri wakigeni ( matured ) basi timu inaweza kuwa bora eneo hilo.

Kikubwa Simba wanahitajika kusimama imara kwenye kauli mbiu yao NGUVU MOJA ili kuijenga timu yenye ushindani mkubwa katika michuano iliyo mbele yao hususani kombe la Shirikisho. Kama klabu kipindi hiki cha usajili waitathimini timu kwa viwango vya vilabu watakavyokutana navyo katika michuano ya kombe la Shirikisho ili wajue ubora wao na mapungufu yao.

By Samuel Samuel

One Comment

  1. john tolyo

    November 30, 2017 at 4:07 pm

    Mtazamo kwa clab ya simba ni sahihi kabisa nikolaus gyan, laudit mavugo, watolewe na kutafta mbadala
    wao

Leave a Reply

Your email address will not be published. Required fields are marked *